某日早上，聽到隔離檯一位爸爸好用心咁教亞仔要睇多啲中文，亞爸話：「要睇多啲中文架，點解我send 比你果啲片你唔睇？好難搵中文又啱你睇又有趣嘅片（原來係成語動畫廊），你英文點解好啊？就係你肯睇囉⋯⋯」，看得出亞爸用心良苦，但長氣成咁又難怪亞仔一臉無奈。
經常聽到家長分享子女對某一方面特別掌握而對另一學科缺乏興趣，問點解同點搞？講真，真係興趣大過天，想小朋友進步真係要由培養興趣開始，需要時間、方法同堅持，真係缺一不可。
記得以前有位小學嘅媽媽同我分享，佢運用長假期同小朋友一齊閱讀。睇書？嘩！好長時間，小朋友點頂得順？原來呢位媽媽係有目標，想提升小朋友對中英文學習能力，而揀睇課外嘅書，重點係長假期可以營造輕鬆無壓力嘅氣氛，無興趣睇書，就由亞媽先講故事，繪形繪聲，慢慢小朋友就真係投入咗，成績仲好好（真人真事）。真係一分耕耘 一分收穫（我講緊父母）。
農曆新年將至，希望新一年子女邊方面有所改善？不如依家諗下有咩方面可以培養佢嘅興趣。把握好運用長期假，幫助學習較弱嘅範疇「追番上嚟」。
#FritzS #學習興趣 #育兒 #parenting #培養興趣 #教具